இன்று முதல் டி20 உலகக் கிண்ண கிரிக்கெட்!

ஐசிசியின் 8 ஆவது மகளிா் டி20 உலகக் கிண்ண கிரிக்கெட் போட்டி, தென்னாப்பிரிக்காவில் வெள்ளிக்கிழமை தொடங்குகிறது.
முதல் நாள் ஆட்டத்தில் தென்னாப்பிரிக்கா – இலங்கை அணிகள் சந்திக்கின்றன. இந்தியா தனது முதல் ஆட்டத்தில் பாகிஸ்தானுடன் 12 ஆம் திகதி மோதுகிறது.
இந்தப் போட்டியில் பங்கேற்றுள்ள 10 அணிகள், தலா 5 வீதம் 2 குரூப்-களாக பிரிக்கப்பட்டுள்ளன. இதில் குரூப் 1-இல் அவுஸ்திரேலியா, பங்களாதேஷ், நியூஸிலாந்து, தென்னாப்பிரிக்கா, இலங்கை அணிகளும், குரூப் 2-இல் இங்கிலாந்து, இந்தியா, அயா்லாந்து, பாகிஸ்தான், மேற்கிந்தியத் தீவுகள் அணிகளும் இடம்பெற்றுள்ளன.
இதுவரையிலான 7 எடிஷன்களில் 5 முறை கிண்ணத்தை வென்று ஆதிக்கம் செலுத்தும் அவுஸ்திரேலியா, தற்போது 6 ஆவது முறையாக கிண்ணத்தை வெல்லும் முனைப்புடன் வருகிறது.
கடந்த எடிஷனில் (2020) இதே அவுஸ்திரேலியாவிடம் இறுதிச்சுற்றில் தோற்று வாகை சூடும் வாய்ப்பை இழந்த இந்தியா, மீண்டும் முதல் கிண்ணத்திற்கான கனவுடன் இந்த எடிஷனில் களம் காண்கிறது.